ست سرا چوک، مقامی حکومت اور ہمارا اجتماعی المیہ

پاکستان میں ضلعی سطح پر لوکل گورنمنٹ کا بنیادی کام عوام کی زندگی کو آسان، محفوظ اور منظم بنانا ہے۔ ان کی ذمہ داریوں میں شہری منصوبہ بندی، صفائی، ٹریفک مینجمنٹ، چھوٹے پیمانے پر ترقیاتی منصوبے، پارکوں اور سڑکوں کی مرمت و توسیع، اور عوامی سہولیات کی فراہمی شامل ہے۔ یہ ادارے بنیادی طور پر عوام کے قریب ترین حکومتیں ہیں جو روزمرہ کے مسائل کے فوری حل کی ضامن ہونی چاہئیں۔ لیکن جب مقامی حکومتیں اپنی صلاحیتوں کے مطابق بہترین فیصلے بھی لیتی ہیں، تو بدقسمتی سے ہمارا اجتماعی رویہ ان فیصلوں کو ناکامی میں بدل دیتا ہے۔

منڈی بہاءالدین کا ست سرا چوک ایک ایسا مقام ہے جہاں سے سات اہم راستے نکلتے ہیں۔ اس وجہ سے یہاں مسلسل ٹریفک کا دباؤ رہتا ہے۔ لوکل گورنمنٹ نے یہاں کی بڑھتی ہوئی ٹریفک کے مسائل کو سمجھتے ہوئے ڈبل لائن روڈ پر ایک “X” شیپ یوٹرن بنایا۔ یہ یوٹرن نہایت فہم و فراست سے ڈیزائن کیا گیا تھا تاکہ ٹریفک کا بہاؤ بہتر ہو، اور چوک پر رش کم کیا جا سکے۔

اگر یہ یوٹرن ست سرا چوک اور کنگ روڈ چوک کے درمیان درمیان میں بنایا جاتا، تو دونوں سمتوں سے آنے والے ٹریفک کو 500-500 میٹر پہلے وارننگ سائن بورڈز کے ذریعے آگاہ کیا جا سکتا تھا۔ یہ ایک بین الاقوامی معیار کے مطابق منصوبہ بندی ہوتی۔ تاہم، باوجود اس تکنیکی بہتری کے، ہمارا روڈ یوزر کلچر اس کے لیے تیار نہیں تھا۔ چونکہ روڈ ٹریفک قوانین کی پابندی ہماری ترجیحات میں شامل ہی نہیں، اس لیے وہاں آئے روز حادثات ہونے لگے اور مقامی حکومت کو بالآخر وہ یوٹرن ختم کرنا پڑا۔

اصل مسئلہ نہ تو یوٹرن کا ڈیزائن تھا، نہ ہی مقامی حکومت کی نیت یا کارکردگی میں کوئی خامی تھی۔ اصل ناکامی ہمارے رویوں میں تھی۔ بدقسمتی سے بحیثیت قوم ہم روڈ سیفٹی اور قوانین کے حوالے سے مکمل طور پر لاشعور ہیں۔ اشارے، لائنز، یوٹرنز، اور ون وے سڑکوں کا احترام کرنا تو دور کی بات، ہم اکثر اپنی ضد، جلد بازی، اور بے ترتیبی کو اپنی “چالاکی” سمجھ بیٹھے ہیں۔

آج ضرورت اس امر کی ہے کہ ہم صرف سڑکوں کی تعمیر پر نہیں بلکہ سڑکوں کے استعمال کے شعور پر بھی سرمایہ کاری کریں۔ ہر شہر، ہر ضلع میں روڈ سیفٹی کے حوالے سے عوامی مہمات شروع ہونی چاہئیں۔ سکولوں، کالجوں، مساجد، میڈیا اور سوشل پلیٹ فارمز کے ذریعے مستقل بنیادوں پر لوگوں کو قوانین کی اہمیت سمجھائی جائے۔ اگر ہم نے فوری طور پر اس طرف توجہ نہ دی تو سڑکوں پر مزید ترقیاتی کام بھی اسی طرح ضائع ہوتے رہیں گے۔

آئیے! ہم سب مل کر عہد کریں کہ نہ صرف اپنی حفاظت بلکہ دوسروں کی جان و مال کے تحفظ کے لیے بھی روڈ قوانین کی مکمل پاسداری کریں گے۔ ترقی صرف سڑکوں کی تعمیر سے نہیں ہوتی، ترقی قانون کی حکمرانی اور اجتماعی شعور سے جنم لیتی ہے۔

مزمل حسین چیمہ